A quinta edición dos Premios GirlGeekPower recoñecerá o martes 10 de decembro os mellores expedientes femininos da Universidade de Vigo nas carreiras de Ciencias, Ciencias da Saúde, Enxeñaría e Arquitectura
A quinta edición dos Premios GirlGeekPower, unha iniciativa enmarcada na Cátedra de Feminismos 4.0 Depo-UVigo, entregará o martes 10 de decembro ás 12:00 h. os seus galardóns, que recoñecen os mellores expedientes femininos da Universidade de Vigo do curso 2023/2024 en dúas categorías, estudos de Ciencias e Ciencias da Saúde e estudos de Enxeñaría e Arquitectura.
En cada categoría farase entrega de dous distintivos: un primeiro premio dotado con 2.000€ e un accésit de 1.000€.
A deputada de Igualdade e Benestar da Deputación de Pontevedra, Sandra Bastos Míguez, será a encargada de abrir o acto que será clausurado polo reitor da Universidade de Vigo, Manuel Joaquín Reigosa Roger. Ambos farán tamén entrega dos diplomas acreditativos ás estudantes premiadas mentres que Mar Fernández Cendón, técnica superior de Igualdade da UVigo, presentará ás gañadoras, que intervirán tamén no acto con cadanseu discurso.
O acto celebrarase de forma presencial na sede da Deputación de Pontevedra en Vigo e tamén se retransmitirá vía streaming a través da UVigoTV – Directo 1.
