A terceira edición dos Premios GirlGeekCovid recoñecerá este xoves 9 de febreiro os mellores expedientes femininos en Ciencias e Enxeñaría e Arquitectura da Universidade de Vigo

A terceira edición dos Premios GirlGeekCovid, unha iniciativa enmarcada na Cátedra de Feminismos 4.0 DEPO-UVigo, entregará este xoves 9 de febreiro ás 12:00 h os seus galardóns, que recoñecen os mellores expedientes femininos en Ciencias e Enxeñaría e Arquitectura da Universidade de Vigo deste curso.

En cada categoría farase entrega de dous distintivos: un primeiro premio dotado con 2.000€ e un accésit de 1.000€.

A presidenta da Deputación de Pontevedra, Carmela Silva, será a encargada de abrir o acto que será clausurado polo reitor da Universidade de Vigo, Manuel Joaquín Reigosa Roger. Ambos farán tamén entrega dos diplomas acreditativos ás estudantes premiadas mentres que será Águeda Gómez, directora da Unidade de Igualdade, a encargada de presentarnos ás gañadoras. Á súa vez estas últimas intervirán tamén no acto con cadanseu discurso.

O acto celebrarase de forma presencial na sede da Deputación de Pontevedra en Vigo e tamén se retransmitirá vía streaming a través da UVigoTV – Directo 1.