Aberta a convocatoria dos premios GirlGeekPower 2024/2025
A quinta edición dos premios impulsados pola Cátedra de Feminismos 4.0 DEPO-UVigo xa está en marcha. As estudantes STEM dos campus de Pontevedra e Vigo poden presentar a súa candidatura a este galardón entre o 2 e o 16 de outubro. As bases da convocatoria están dispoñibles na Secretaría Online da UVigo.
Os premios GirlGeekPower teñen dúas modalidades, unha para estudantes das ramas de Ciencias e Ciencias da Saúde e outra para as da rama de Enxeñaría e Arquitectura. Todas as categorías teñen recoñecemento académico e económico, con dotacións de 2.000 euros para cada premio e 1.000 euros no caso dos accésit.
Condicións
Para ser seleccionadas, as participantes deberán:
1. Estar matriculadas na Universidade de Vigo no curso 2024/2025 en 60 créditos en titulacións de grao ou mestrado universitario das ramas de Enxeñaría e Arquitectura ou Ciencias e Ciencias da Saúde dos campus de Pontevedra e Vigo
2. Para as estudantes de grao ter superados ata o curso 2023/2024, 60 créditos da titulación na que están matriculadas
3. Ter unha nota media de expediente ata o curso 2023/2024 no caso de continuación de estudos, ou de acceso no caso de inicio de estudos igual ou superior a:
o 7 nas titulacións da rama de Enxeñaría e Arquitectura.
o 8 nas titulacións da rama de Ciencias
o 8 nas titulacións da rama de Ciencias da Saúde
4. Non ter recibido este premio en ningunha das convocatorias anteriores para o mesmo ciclo.
A candidatura realízase cumprimentando un formulario en liña. Coa solicitude, deberá incluírse unha carta de motivación, na que as estudantes deberán detallar as razóns que as levaron a realizar estudos universitarios no ámbito das STEM e facer unha reflexión persoal sobre a súa experiencia como mulleres nun eido tradicionalmente masculinizado.
No caso de que a solicitante realizase estudos nunha universidade distinta á de Vigo, é necesario presentar a certificación académica dos estudos cursados.
