“Call for paper”: Aberto o prazo para publicar na revista GENDER ON DIGITAL. Journal of Digital Feminism
A Cátedra de Feminismos 4.0 DEPO-UVigo abre o prazo para enviar os artigos que conformarán o primeiro volume da revista científica GENDER ON DIGITAL, que se publicará a finais do 2023 e que entrará a formar parte do catálogo de revistas do Servizo de Publicacións da Universidade de Vigo. O prazo está aberto ata o 11 de setembro e as publicacións deben estar relacionadas coa temática do primeiro número Sociedade dixital e nesgos de xénero.
O obxectivo da revista GENDER ON DIGITAL é construir un espazo de reflexión científica crítica (e, polo tanto, feminista) en torno as transformacións da sociedade en relación coa irrupción das novas tecnoloxías da comunicación e a conseguinte dixitalización de todas as esferas da vida, pois aínda que levamos máis dunha década facendo un uso masivo do espazo virtual (Internet, redes sociais, wikicontidos, etc) e cada vez somos máis “habitantes da pantalla”, esta tendencia acelerouse a raíz da pandemia, a hexemonía da “economía de datos” (Carissa VELIZ, 2020) e o “capitalismo de vixilancia” (Shoshana, ZUBOFF, 2020), convertendo a nosa existencia nunha especie de “cibervida”.
A revista terá unha periodicidade anual e cada número tratará de afondar nos temas tratados no workshop Hackeando o Patriarcado. Neste primeiro volume de GENDER ON DIGITAL, que se publicará a finais do 2023, os artigos estarán relacionados coa temática Sociedade dixital e nesgos de xénero. A publicación entrará a formar parte do catálogo de revistas do Servizo de Publicacións da Universidade de Vigo.
Esta publicación está orientada a un público especializado do ámbito científico-tecnolóxico, das ciencias sociais e das humanidades localizado no pensamento crítico fronte a todas as transformacións derivadas da dixitalización das nosas vidas, en especial das consecuencias na reprodución das desigualdades reais e efectivas entre mulleres e homes. Admítense achegas de profesorado, persoal investigador en formación, doutoras e doutores.
Directrices para as persoas autoras
Como parte integrante do proceso de envío dun artigo, as persoas autoras teñen que asegurarse de que o seu traballo cumpra todas as condicións que se indican no apartado ‘Envíos’ da web. No caso de non se seguiren estas directrices, os artigos poderanse devolver. A tipoloxía de publicacións admitidas son: artigos monográficos, artigos de investigación, misceláneas e recensións. O prazo de recepción finaliza o 11 de setembro.
Como e onde enviar
O envío realizarase a través da plataforma OJS, aloxada na web do Servicio de Publicacións da Universidade de Vigo. Unha vez rexistrada/o como autora ou autor na plataforma OJS, deberán seguirse os pasos que alí se indican. As dúbidas respecto do envío de traballos poderán consultarse no enderezo electrónico genderondigital@catedrafeminismos.gal. Deben cubrirse todos os campos, incluído o ORCID. O resumo da biografía non debe exceder de 5 liñas. Recoméndase o uso de linguaxe inclusiva e non sexista.
