Aberto o prazo para presentar candidaturas á 3ª edición dos Premios GirlGeekCovid
A Cátedra de Feminismos 4.0 DEPO-UVigo abre o prazo de solicitudes para presentar a candidatura para a terceira edición dos Premios GirlGeekCovid, impulsados pola Deputación de Pontevedra e a Universidade de Vigo e destinados a incentivar, apoiar e fomentar os estudos nos ámbitos STEM (ciencia, tecnoloxía, enxeñería e matemáticas nas súas siglas en inglés) entre as estudantes da Universidade de Vigo.
As solicitudes poderán enviarse ata o 30 de setembro do seguinte formulario en liña e as candidatas poderán optar a un premio e un accésit paras as titulacións da rama de Ciencias e de Ciencias da Saúde e outro premio e accésit paras as pertencentes ao eido da Enxeñaría e Arquitectura. A dotación de cada premio será de 2.000 euros e de 1.000 euros no caso dos accésit.
Requisitos das solicitudes
Para ser seleccionadas, as participantes deberán cumprir unha serie de requisitos, que son os seguintes:
- Estar matriculadas na Universidade de Vigo no curso 2022/2023 en 60 créditos en titulacións de grao ou mestrado oficial das ramas de Enxeñaría e Arquitectura, Ciencias e Ciencias da Saúde dos campus de Pontevedra e Vigo.
- Para o alumnado de grao ter superados ata o curso 2021/2022 un total de 60 créditos da titulación na que se atopa matriculada.
- Ter unha nota media do expediente ata o curso 2021/2022 e de acceso aos estudos de mestrado igual ou superior a:
- 7 nas titulacións da rama de Enxeñaría e Arquitectura.
- 8 nas titulacións da rama de Ciencias.
- 8 nas titulacións da rama de Ciencias da Saúde.
- Non ter recibido este premio en ningunha das convocatorias anteriores.
Documentación e obrigas
As solicitudes deberán realizarse a través do seguinte formulario en liña. Xunto coa solicitude, deberá incluírse unha carta de motivación, na que as candidatas deberán sinalar, por unha banda, as razóns que as levaron a optar por realizar estudos universitarios no ámbito das STEM e, por outra, reflexionar sobre a súa experiencia persoal como mulleres nun eido tradicionalmente masculinizado.
No caso de que a persoa solicitante realizase estudos nunha universidade distinta á de Vigo, requirirase certificación académica dos estudos cursados.
➡️ Máis información, na páxina da Secretaría Online da Universidade de Vigo, no apartado de convocatorias.