A cuarta edición dos Premios GirlGeekPower recoñecerá o vindeiro xoves 21 de marzo os mellores expedientes femininos en Ciencias
A cuarta edición dos Premios GirlGeekPower, unha iniciativa enmarcada na Cátedra de Feminismos 4.0 DEPO-UVigo, entregará este xoves 21 de marzo ás 11:00 h os seus galardóns, que recoñecen os mellores expedientes femininos en Ciencias e Ciencias da Saúde e Enxeñaría e Arquitectura da Universidade de Vigo deste curso.
Farase entrega de catro distintivos: tres premios dotados con 2.000€ e un accésit de 1.000€.
A deputada de Igualdade e Benestar da Deputación de Pontevedra, Sandra Bastos Míguez, será a encargada de abrir o acto que será clausurado polo reitor da Universidade de Vigo, Manuel Joaquín Reigosa Roger. Ambos farán tamén entrega dos diplomas acreditativos ás estudantes premiadas mentres que será Águeda Gómez, directora da Unidade de Igualdade, a encargada de presentar ás gañadoras. Á súa vez estas últimas intervirán tamén no acto con cadanseu discurso.
O acto celebrarase de forma presencial na sede da Deputación de Pontevedra en Vigo e tamén se retransmitirá vía streaming a través da UVigoTV – Directo 1.
