A segunda edición dos Premios GirlGeekCovid recoñecerá o 3 de febreiro os mellores expedientes femininos en Ciencias e Enxeñaría da Universidade de Vigo

A segunda edición dos Premios GirlGeekCovid, unha iniciativa enmarcada na Cátedra de Feminismos 4.0, entregará o próximo 3 de febreiro ás 12:00 h os seus galardóns, que recoñecen os mellores expedientes femininos en Ciencias e Enxeñaría da Universidade de Vigo.

En total, outorgaranse catro recoñecementos: un primeiro premio e un accésit por cada unha das dúas categorías (Ciencias e Enxeñaría), dotados cunha cuantía económica de 2.000 e 1.000 euros, respectivamente.

A apertura do acto correrá da conta presidenta da Deputación de Pontevedra, Carmela Silva. Pola súa banda, o reitor da Universidade de Vigo, Manuel Joaquín Reigosa Roger, será o encargado de clausurar o evento. Ambos tamén farán entrega de cada unha dos diplomas acreditativos ás estudantes premiadas.

O acto celebrarase de forma presencial na sede da Deputación de Pontevedra en Vigo e tamén se retransmitirá vía streaming a través da canle Directo 3 da  UVigoTV.

Nova e última sesión do obradoiro de autodefensa dixital

Pola tarde, de 16 a 18 h, o colectivo Donestech impartirá a segunda sesión do obradoiro práctico en formato online sobre autodefensa dixital feminista con perspectiva de xénero, que celebrou a súa primeira xornada o pasado 27 de xaneiro. A través deste taller, as persoas participantes poderán coñecer e combater os distintos tipos de violencias machistas dixitais.