Aberta a convocatoria dos premios GirlGeekPower 2023
A cuarta edición dos premios impulsados pola Cátedra de Feminismos 4.0 DEPO-UVigo xa está en marcha. As estudantes STEM dos campus de Pontevedra e Vigo poden presentar a súa candidatura a este galardón entre o 21 de xullo e o 29 de setembro. As bases da convocatoria están dispoñibles na Secretaría Online da UVigo.
Os premios GirlGeekPower teñen dúas modalidades, unha para estudantes das ramas de Ciencias e Ciencias da Saúde e outra para as da rama de Enxeñaría e Arquitectura. Todas as categorías teñen recoñecemento académico e económico, con dotacións de 2.000 euros para cada premio e 1.000 euros no caso dos accésit.
Tras o fin da pandemia, esta acción xa consolidada que ten por obxectivo apoiar e incentivar os estudos STEM, tradicionalmente masculinizados, entre as mulleres, actualizan o seu nome e pasan a denominarse premios GirlGeekPower.
Condicións
Para ser seleccionadas, as participantes deberán:
- Estar matriculadas na Universidade de Vigo no curso 2023/2024 en 60 créditos en titulacións de grao ou mestrado oficial das ramas de Enxeñaría e Arquitectura, Ciencias e Ciencias da Saúde dos campus de Pontevedra e Vigo.
- Ter superados ata o curso 2022/2023 un total de 60 créditos da titulación de grao na que están matriculadas.
- Ter unha nota media do expediente ata o curso 2022/2023 e de acceso aos estudos de mestrado igual ou superior a:
- 7 nas titulacións da rama de Enxeñaría e Arquitectura.
- 8 nas titulacións da rama de Ciencias.
- 8 nas titulacións da rama de Ciencias da Saúde.
- Non ter recibido este premio en ningunha das convocatorias anteriores.
A candidatura realízase cumprimentado un formulario en liña. Coa solicitude, deberá incluírse unha carta de motivación, na que as estudantes deberán detallar as razóns que as levaron a realizar estudos universitarios no ámbito das STEM e facer unha reflexión persoal sobre a súa experiencia como mulleres nun eido tradicionalmente masculinizado.
No caso de que a solicitante realizase estudos nunha universidade distinta á de Vigo, é necesario presentar a certificación académica dos estudos cursados.
